Біріккен Ұлттар Ұйымының Бас Ассамблеясымен 1999 жылғы қабылдаған қарарында «25-қараша – әйелдерге қатысты зорлық-зомбылықты жоюдың Халықаралық күні» ретінде белгіленсе, 1948 жылдан бастап 10 желтоқсан – Адам құқығын қорғау күні» ретінде аталып келеді.
Осыған байланысты жыл сайын әлем елдерінде 25 қараша мен 10 желтоқсан күндері аралығында «Зорлық-зомбылықсыз 16 күн» акциясы дәстүрлі түрде өткізіліп келеді. Акция «Әйелдерге қатысты зорлық-зомбылықты жою үшін Халықаралық күрес күні» мен «Адам құқығын қорғау күні» аралығын, яғни қатарынан алғанда 16 күнді қамтиды.
Акцияның негізгі мақсаты әйелдерге қатысты зорлық-зомбылықты ескерту, жолын кесу, ана мен баланы қорғау, қоғамдағы отбасының рлін күшейту бойынша қабылданып жатқан шараларды қоғамға таныстыру.
Аталған іс-шара барысында елдімекендерде полицияның қоғамдық көмекшілерін, жастар бірлестіктерін, үкіметтік емес ұйымдарды тарта отырып, отбасылық құндылықтарды насихаттау жөніндегі іс-шаралар жүзеге асырылады.
Жетісу облысының орталығы Талдықорған қаласындағы «Тұрмыстық зорлық-зомбылық құрбандарына әлеуметтік көмек көрсету орталығында» отбасылық-тұрмыстық қатынастар саласындағы мәселелер бойынша «Қауырт желі» жұмысы ұйымдастырылады. Ол үшін аталған мекемеге (1301), ұялы телефоннан 8 (72-82-28-00-05) хабарласуға болады.
Егер Сіз немесе сіздің жақындарыңыз зорлық-зомбылықтың құрбаны немесе куәгері болып жатсаңыз 102 арнасына хабарласыңыз, сіздің немесе жақындарыңыздың заңды құқықтарыңыз бен бостандықтарыңыз қолданыстағы заңнамаға сәйкес қорғалатын болады.
Ерболат СҰЛТАНАЕВ,
Панфилов АПБ-нің ЖПҚБ
Әйелдерді зорлық-зомбылықтан қорғау
тобының инспекторы, полиция капитаны
