Қасым-Жомарт Тоқаев елордадағы «Атамекен» этномемориалды кешенінде өткен Мемлекеттік Ту көтеру рәсіміне қатысты. Салтанатты шара барысында Құрмет қарауылының бастығы Президентке дайындық туралы рапорт берді. Одан кейін еліміздің Әнұраны орындалып, көк байрағымыз көкке көтерілді.
Мемлекет басшысы Мемлекеттік Ту көтеру рәсімінде сөз сөйлеп, жиналған қауымды Мемлекеттік рәміздер күнімен құттықтады.
«Баршаңызды Мемлекеттік рәміздер күнімен шын жүректен құттықтаймын! Бұл – қасиетті Отанымыз – Қазақ елінің әрбір азаматы үшін маңызы ерекше мереке. Біз осы күні байрағымызды биікке көтеріп, еңселі, егемен ел екенімізді күллі әлемге паш етеміз.
Қастерлі рәміздеріміз – ұлт құндылықтарының жарқын символы. Мемлекетіміздің әр нышаны халқымыздың болмыс-бітімінің көрінісі саналады. Елтаңба – елдігіміздің айшықты белгісі, Әнұран – азаттығымыздың айбынды үні, ал Көк Ту – Тәуелсіздік тұмары. Осы үш рәмізді мемлекетіміздің мызғымас үштағаны десек, артық болмайды.
Тарихқа үңілсек, халқымыз әрқашан бір тудың астына жиналып, ынтымақ-бірлігін сақтай білген. Бүгінде де еліміз ауызбіршілігін нығайтып, алға қарай нық қадам басып келеді», – деді Президент.
Сондай-ақ Мемлекет басшысы ұлттық нышандарды қадірлеу – отаншылдық рухының ең биік өлшемі екенін атап өтті.
«Бәріңізге белгілі, наурыз айында біз біртұтас қоғам болып жалпыұлттық референдумға қатыстық. Азаматтарымыз конституциялық реформаны қолдап, дауыс берді. Осылайша, жаңа Конституциямыз қабылданып, төл тарихымыздың жаңа парағы ашылды.
Ата заңда халқымыздың сан ғасырлық арман-тілегі, мақсат-мұраты көрініс тапты. Кең байтақ жеріміздің тұтастығы, еліміздің егемендігі, азаматтардың құқықтары мен бостандықтары басты құндылықтар ретінде айқындалды. Сонымен қатар заң мен тәртіпті сақтау, білім мен ғылымды дамыту, жаңа технологияларды енгізу, тазалықты дәріптеу, табиғатты қорғау және волонтерлік қызметті қолдау конституциялық міндеттер ретінде белгіленді. Түбегейлі жаңарған Ата заңымыз Әділетті Қазақстанның мызғымас жарғысына айналды.
Конституцияда әр азаматтың мемлекеттік рәміздерді құрметтеуі тиіс екені де нақты көрсетілді. Өйткені ұлттық нышандарды қадірлеу – отаншылдық рухының ең биік өлшемі», – деді Президент.
Президент сондай-ақ алдағы уақытта Үкімет мемлекеттік рәміздерді орынды пайдалану мәселесі бойынша тиісті қаулыға қажетті түзетулер енгізетінін атап өтті.
«Нағыз патриоттар ғана елдің көшін алға бастайды, жердің шетін жаудан қорғайды. Басқаша айтқанда, отаншылдық – ел қауіпсіздігі мен тұтастығының кепілі.
Ұлттық нышандардың мәртебесін арттыру – аса маңызды мемлекеттік міндет. Таяу арада Үкімет мемлекеттік рәміздерді орынды пайдалану мәселесі бойынша қаулыға қажетті түзетулер енгізеді. Ұлттық нышандарды ұлықтау – ортақ парыз, әр азаматтың қасиетті міндеті. Түптеп келгенде, рәміздерді қастерлеу – мемлекетімізді құрметтеу», – деді Мемлекет басшысы.
