Мемлекет басшысы Қасым-Жомарт Тоқаев биылғы Жолдауында еліміздің цифрлық даму бағытын айқындап, жаңа міндеттер қойды. Президенттің айтуынша, «Цифрлық технологиялар – экономиканың барлық саласында тиімділікті арттырудың басты тетігі. Біз бұл салада артта қалмауымыз керек, керісінше, көшбасшы елдердің қатарына ұмтылуымыз қажет».
Бүгінде жасанды интеллект, үлкен деректерді өңдеу, блокчейн, «ақылды қала» жобалары сияқты бағыттар тек әлемдік тәжірибеде емес, Қазақстанда да қарқын алып келеді. Мемлекет басшысы бұл үрдісті жеделдету үшін нормативтік-құқықтық базаны жетілдіру, ІТ мамандарды даярлау және шетелдік инвестицияны тарту қажеттігін атап өтті.
«Цифрлық даму – ұлттық қауіпсіздік пен экономикалық қуаттың маңызды факторы. Сондықтан мемлекет тарапынан барлық жағдай жасалады. Бірақ бұл іске жеке сектор да белсенді араласуы тиіс», – деді Президент.
Осыған орай елімізде ІТ стартаптарды қолдау орталықтары, технопарктер мен инновациялық хабтар құрылады. Бұл жастарға өз идеяларын жүзеге асырып қана қоймай, жаһандық бәсекеге қабілетті болуға мүмкіндік береді. Жолдауда айтылғандай, «Жасанды интеллект саласында Қазақстан аймақтағы жетекші орталыққа айналуы тиіс».
Сондай-ақ Президент ауыл-аймақта интернет жылдамдығын арттыруды тапсырды. «Қаламен қатар ауыл тұрғындары да цифрлық қызметтерді толық пайдалана алуы керек. Бұл – әлеуметтік әділеттіліктің талабы», – деді Қасым-Жомарт Тоқаев.
Жолдаудағы бұл міндеттер Қазақстанды жаңа дәуірге бастайды. Цифрлық технологияны игерген ел ғана уақыт көшінен қалмай, алға озады. Ендігі міндет – айтылған тапсырмаларды жүзеге асырып, нақты нәтижеге қол жеткізу. Білімді жастарды қолдасақ, жағдайларын жасап, мүмкіндік берсек еліміз цифрлық мемлекетке айналары сөзсіз.
Нұрәділ БЕГІМБЕТ,
Қазақстанның Құрметті журналисті,
Панфилов ауданының Құрметті азаматы
