Демалыс күндері Жетісу облысында полиция қызметкерлері тұрғындар арасында интернет-алаяқтықтың алдын алуға бағытталған профилактикалық жұмыстар жүргізді, – деп хабарлайды 7-su.kz ақпарттық порталы.
Іс-шара барысында азаматтарға алаяқтықтың кең таралған және жаңа түрлері туралы түсіндірме берілді. Полиция қызметкерлері әсіресе егде жастағы тұрғындарға ерекше назар аударды.
Құқық қорғау органдарының мәліметінше, алаяқтар өздерін банк, құқық қорғау органдары немесе басқа да ұйымдардың қызметкері ретінде таныстырып, азаматтарды түрлі тәсілдермен алдауға тырысады. Осыған байланысты тұрғындарға жеке деректерін, банк картасының реквизиттерін және SMS арқылы келетін растау кодтарын бөгде адамдарға бермеу қажеттігі ескертілді. Сонымен қатар Орталық базарда тұрғындармен түсіндіру жұмыстары жүргізіліп, интернет-алаяқтықтан сақтану жолдары көрсетілген 2 мыңға жуық ақпараттық жадынама таратылды.
Полиция азаматтарды қырағы болуға және бейтаныс адамдардың қоңыраулары мен хабарламаларына сенбеуге шақырады. Күмәнді жағдай туындаған кезде әңгімені дереу тоқтатып, ақпаратты тиісті ұйымдардың ресми байланыс арналары арқылы нақтылау қажет.
