Конституциялық комиссияны құру — Мемлекет басшысының ойластырылған әрі қисынды шешімі деп есептеймін. Ұлттық құрылтайдың соңғы отырысында Президент ұсынған реформалардың ауқымы Қазақстанның саяси жүйесін сапалы жаңа деңгейге шығаруға бағытталғанын көрсетті.
Ұсынылып отырған өзгерістер жекелеген түзетулер шеңберінен әлдеқайда кең. Олардың мазмұны мен көлемі іс жүзінде жаңа Конституция қабылдаумен пара-пар. Мұндай жағдайда процесті кездейсоқ немесе фрагментті түрде жүргізу қауіпті.
Сондықтан бұл жауапты міндетті Мемлекет басшысы бекіткен арнайы Конституциялық комиссияға жүктеу — институционалдық тұрғыдан дұрыс қадам. Комиссия реформаларды жүйелі түрде қарап, олардың өзара байланысын, құқықтық және қоғамдық салдарын кешенді бағалауға мүмкіндік береді.
Қысқасы, бұл шешім реформалардың сапасына ғана емес, олардың легитимдігіне де тікелей әсер етеді. Конституциялық өзгерістер дәл осындай дайындықпен және айқын мандатпен жүзеге асуы тиіс.
«Жаркент айнасы» газетінің тілшісі Қали ИБРАЙЫМЖАНОВ
