Бүгін Үлкен ауылдық округіндегі № 332 референдум учаскесі жұмысын бастады. Таңертеңнен бастап ауылдың 150-ден астам тұрғын өз таңдауын жасады.
«Бүгінгі референдумның маңызы зор. Бұл — халықтың елдің болашағына қатысты шешімдерді өз қолына алатын сәті. Әрбір дауыс берушінің таңдауы маңызды. Өз таңдауымызбен біз мемлекетіміздің дамуына үлес қосамыз. Мені бүгінгі референдумға азаматтық борышым жетеледі. Біз өз болашағымызға немқұрайлы қарамауымыз керек», — деді ауыл тұрғыны Рахима Қайырбекова.
Жалпы, Алматы облысы бойынша 643 дауыс беру учаскесі бар. Жамбыл ауданында 77 учаске жұмыс істеп тұр. Сондай-ақ облыстық комиссияның ресми интернет-ресурсында «Референдум-2024» атты бөлімше құрылды. Бұл бөлімде үнемі инфографика, бейне және аудиоматериалдар сияқты медиа-контент жарияланып отырады.
Еске салайық, бүгін қазақстандықтар атом электр станциясын салу мәселесі бойынша жалпыұлттық референдумда дауыс береді.
Орталық референдум комиссиясы төрағасының орынбасары Константин Петров елдің барлық өңірінде Қазақстанда атом электр станциясын салу мәселесі бойынша жалпыұлттық референдум басталғанын ресми мәлім етті.
Бұған дейін хабарланғанындай, Премьер-министр Олжас Бектенов Астана қаласындағы Оқушылар сарайында орналасқан №61 учаскеде дауыс берді.
1 шілдедегі жағдай бойынша ел көлемінде 12 176 968 адам референдумда дауыс беруге хақылы.
