Мемлекет басшысы Қасым-Жомарт Тоқаевтың былтырғы Жолдауындағы «Тұрғын үй-коммуналдық шаруашылығы мен су инфрақұрылымын жаңғырту – тұрақты дамудың негізгі факторы» атты бесінші бағытқа сәйкес Жетісу облысында инфрақұрылымның тозуын төмендету мен басқарудың жаңа моделін құру шаралары белсенді іске асып жатыр. Бұл жөнінде Бейсен Құранбек атындағы Журналистер үйіне арнайы келген ҚР Ұлттық экономика министрлігі Табиғи монополияларды реттеу комитетінің Жетісу облысы бойынша департаментінің басшысы Думан Қалибеков айтты.
Өңірде департамент тарапынан 44 табиғи монополия субъектісінің қызметі реттеледі, оның ішінде су шаруашылығы бойынша – 17, жылу энергетикасында – 13, кірме жолдар саласында – 12, электр энергетикасында – 5 және газбен жабдықтау саласында 3 субъекті бар. Есепті кезеңде тарифтер мен инвестициялық бағдарламаларды өзгертуге 23 өтінім келіп түсіп, оның ішінде 3 тарифтік смета мен 2 инвестициялық бағдарлама бекітілді, ал 2 өтінім кері қайтарылды. Бұл департаментті биылғы алты айлыққа жасаған қорытындысы.
– «Энергетикалық және коммуналдық секторларды жаңғырту» ұлттық жобасы аясында биыл облыстың негізгі коммуналдық кәсіпорындарына қомақты инвестициялар тартылып жатыр. Атап айтқанда, электр энергетикасы саласында «Талдықорған акционерлік көлік электр желісі компаниясы» АҚ-ның желілер мен жабдықтарды жаңартуға 8,8 млрд теңге, ал жылу энергетикасында «Талдықорғанжылусервиске» 4,7 млрд теңге инвестиция қарастырылған. Сумен жабдықтау және су бұру салалары бойынша ең үлкен көлем «Текелі су құбыры» МКК-на тиесілі – 13,12 млрд теңге, оның ішінде кәріздік тазарту құрылысына 8,0 млрд теңге берілді. Одан бөлек, «Қаратал Таза Су» МКК-ның кәріздік тазартудың құрылысына 4,3 млрд теңге, өндірістік процестерді автоматтандыру үшін «Жетісу Су Құбыры» МКК-на 2,6 млрд теңге, сондай-ақ «Алакөл Су», «Ескелді Су Құбыры» және «Панфилов Су Құбыры» кәсіпорындарының жүйелерін жаңғыртуға жалпы алғанда 2,9 млрд теңгеден астам қаражат бөлінді. Қазіргі уақытта «Талдықорған акционерлік көлік электр желісі компаниясы» АҚ тарапынан ұлттық жоба шеңберінде тарифтік смета мен инвестициялық бағдарламаны өзгертуге өтінімдер жолданып, олар департаменттің қарауында жатыр, – деді өз баяндамасында Думан Сейітқұлұлы.
Үкіметтің инфляцияны 11%-дан асырмай ұстап тұру және тарифтердің өсуін тежеу жөніндегі тапсырмаларына сәйкес, Жетісу облысында халық үшін тарифтер 2026 жылғы 1 сәуірге дейін төмендетілген болатын. Нәтижесінде, сумен жабдықтау тарифі 1 текше метр үшін 74,80 теңгеден 68,0 теңгеге дейін (9,1%-ға) арзандап, су және жылумен жабдықтау бойынша бұрын қолданыста болған әлеуметтік нормалар тоқтатылды. Газ жабдықтау тарифі де халық үшін 1000 текше метрге 45 395,12 теңгеден 40 510,27 теңгеге дейін (10,7%-ға) төмендетілді. Сондай-ақ, бірінші тоқсанның соңына дейін тұрғындар үшін табиғи монополиялар қызметінің бағасын өсіруге ресми шектеу енгізілді.
«Жетісу-Ақпарат»
