Биылғы жылы жазиралы Жаркент өңірінің диқан қауымы аудандағы жалпы егістік көлемін 43 661 гектардан асыруды жоспарлапты. Оның ішінде жетекші дақыл жүгерінің егістік көлемін 23 мың гектардан асырмақшы. Қазір жүгері тұқымын егу жұмыстары ауданда қарқын алған. Бүгінгі күнге дейін 16 мың гектардан астам алқапқа «дала аруының» дәні егілді.
Жүгерішілер биыл күзде суарылған жердегі ылғалдың молдығын, күн шуағының әдеттегіден қуатты қызуын пайдаланып, сәуір айының алғашқы аптасынан бастап жер жыртып, тұқым себуді бастап кеткен болатын. Оған дейін топырақ жылуын көп талғамайтын жаздық бидай, арпа, көп және бір жылдық шөп, картоп, бақша, майлы дақылдар егу жұмыстары қолға алынып, жоспарланған іс тиянақты тындырылды.
– Көктемгі егін егу науқаны алдын-ала жоспарлағанымыздай ретімен атқарылуда, – дейді аудандық Ауыл шаруашылық бөлімінің басшысы Тоқтарғали Шабеков. – Бүгінгі күнге дейін жаздық дәнді дақылдардан 300 гектарға жуық алқапқа бидай мен арпа, 156,3 гектарға майлы дақылдар, 720 гектар картоп, 554 гектарға көкөністер, 139 гектар жерге бақша және жаңадан 16439,6 гектар көп жылдық шөп егіліп, бұл бағыттағы жұмысымыз толық аяқталды. Жүгері тұқымын егуді мамыр айының соңына дейін аяқтаймыз ба деп отырмыз. Науқанға жалпы 70 дән себетін, 92 тырма, 102 соқа, 82 қопсытқыш техникалар және 700-ден астам шынжыр табанды, доңғалақты тракторлар қатыстырылуда.
– Биылғы науқанға қажетті 628,7 тонна «дала аруының» сұрыпты, буданды тұқымдары қажет. Соның 500 тоннаға жуығы «Балтабай» тұқым дайындайтын ЖШС-нен алынып, алдын-ала әзірленген. Қожалықтардың мемлекеттік агро порталына берген өтінімдеріне сәйкес көктемгі дала жұмыстарына 53 ЖШҚ-на 125,5 тонна арзандатылған дизель отынын бөлу жөніндегі сұранысы мақұлданды. Қазір арзандатылған жанармайдың бәрі дерлік тиесілі қожалықтардың қолына тиді. Жалпы 1800 тонна жанармай жұмсалады, – дейді аудандағы ауыл шаруашылық мамандары.
Егіннен мол өнім жинау үшін өңір қожалықтарына 15 мың тоннаға жуық минералды тыңайтқаштар қажет. Бұл мәселені шешуді өткен жылдан бері арнайы шұғылданатын кәсіпорын құрылып, олар Ақтау мен Тараз қаласындағы тыңайтқыштар өндіретін кәсіпорындармен байланыс орнатып, биыл ауданға 11890 тоннадан астам тыңайтқыш жеткізіп, таратылды. Оның 5840 тоннасы аммафос, 8760 тоннасы селитра.
Жалпы көктемгі егін егу жұмыстарына қажетті барлық шаралар талап деңгейінде атқарылуда. Соның нәтижесінде науқан тоқтаусыз жүргізілуде. Тек таудағы көктем күнінің әдеттегіден салқын болуы салдарынан егін егілетін жерлерді суару жұмыстары біршама қиындықтар туындатуда. Шаруалар күн райы жылыған сайын өзен сулары молығар деген үмітте.
Мырзағали НҰРСЕЙІТ
