«Таза Қазақстан» экологиялық акциясы аясында өткен облыстық сенбілікке өңірдің 33 мыңға жуық тұрғыны қатысып, елді мекендердің аумағын абаттандыру және тазалау жұмыстарын бірлесе атқарды.
Экологиялық іс-шараға мемлекеттік органдардың, ұйымдар мен кәсіпорындардың өкілдері, қоғамдық бірлестіктердің мүшелері, жастар, волонтерлер, сондай-ақ облыс қалалары мен аудандарының тұрғындары қатысты.
Облыс орталығы Талдықорған қаласында өткен сенбілік барысында Қаратал өзенінің жағалауы тазартылды.
Жалпы экологиялық акция аясында қоғамдық аумақтарды, көшелерді, аулаларды, саябақтар мен скверлерді және басқа да учаскелерді санитарлық тазалау және абаттандыру жұмыстары жүргізілді. Оған 287 арнайы техника жұмылдырылды.
Облыстық сенбілікте 2 935 тонна қоқыс жиналып, арнайы орындарға шығарылды.
Атап өтсек, 2026 жылдың басынан бері өңірде қоршаған ортаны қорғау және экологиялық мәдениетті қалыптастыру бағытында 180 іс-шара өткізіліп, оған 133 мыңнан астам адам қатысты. Осы уақыт аралығында 58 мың көшет отырғызылып, 12 мың тонна қоқыс шығарылды.
