Жетісу облысында шомылу маусымы басталғалы судағы қауіпсіздік шараларын күшейту мақсатында жедел алдын алу жұмыстары жүргізілуде. Төтенше жағдайлар департаментінің хабарлауынша, маусым айынан бері 7 бала құтқарылып, суға шомылуға рұқсат етілмеген жерлерде 2 адамның, оның ішінде бір баланың қаза болғаны тіркелді.
Маусым айынан бастап ТЖД қызметкерлері полиция департаментімен, жергілікті атқарушы органдармен және еріктілермен бірлесіп 967 рейд пен патрульдік іс-шара өткізіп, оған 1000-нан аса адам қатысты.
Су айдындарындағы қауіпсіздік талаптарын бұзғаны үшін Әкімшілік құқық бұзушылық туралы кодекстің 412-бабы бойынша 42 адам жауапкершілікке тартылып, жалпы сомасы 578 мың теңге көлемінде айыппұл салынды.
Жыл басынан бері шомылуға рұқсат етілген 5 орын мен тыйым салынған 76 учаске облыс әкімдігі мен мәслихаты тарапынан бекітілді. Бұл ретте, халық көп жиналатын орындарда қауіпсіздікті қамтамасыз ету үшін жедел-құтқару жасағының теңгерімінде 16 моторлы жүзу құралы бар, оның ішінде 4 катер және 12 темір қайық.
Облыс аумағындағы 23 су айдынының түбі тексерілді. Атап айтқанда: Ақши ауылында – 3 балалар лагері және 4 қоғамдық жағажай, Лепсі ауылында – 15 демалыс аймағы, Талдықорғанда – 1 қалалық жағажай қамтылған.
Сарқан ауданында күніне 3 құтқарушы кезекшілікке түсіп, Балқаш көлінің жағалауын 2 құтқарушы патрульдейді. Алакөл ауданында 2 құтқарушы күн сайын қызмет атқарып, көл жағалауын 8 құтқарушы бақылайды. Ауданға қосымша 4 құтқарушы жұмылдырылды. Жалпы, бұл аудандарда 13 моторлы қайық қолданыста.
Жетісу облысының Төтенше жағдайлар департаменті азаматтарды судағы қауіпсіздік ережелерін сақтауға және тек жабдықталған жағажайларды пайдалануға шақырады.
