Талдықорған қаласында білім беру саласындағы ашықтықты арттыру және сыбайлас жемқорлық тәуекелдерін төмендету мақсатында «E-zhetysu QR» жүйесі іске қосылды. Алдағы уақытта жоба Жетісу облысының барлық аумағында кеңейтілетін болады.
Бұл жүйе білім беру ұйымдарында балалардың келуін есепке алу үшін арналған. Қазіргі уақытта ол қаладағы мемлекеттік бюджет есебінен қаржыландырылатын 16 мемлекеттік және 48 жеке меншік балабақшаға енгізілді. Сонымен қатар, жүйенің функционалын кеңейту аясында мектепке дейінгі мекемелерде тамақтану есебін автоматтандыру жоспарлануда.
Қаржыландырудың ашықтығын қамтамасыз ету және бюджет қаражатының мақсатты пайдаланылуын бақылау үшін жүйе ҚР Оқу-ағарту министрлігінің № 372 бұйрығына сәйкес Қаржы орталығымен интеграциялануда. Бұл мектепке дейінгі ұйымдарға кезекке қою, балаларды қабылдау және мемлекеттік білім беру тапсырысын орналастыру үдерістерін жетілдіруге мүмкіндік береді. Сондай-ақ, осы бұйрыққа сәйкес, Жетісу облысында биылғы наурыз айынан бастап ваучерлік қаржыландыру жүйесіне көшу жоспарланып отыр.
Жүйені енгізудің барлық техникалық аспектілері аяқталды. Қаржыландыру тәртібі мен берілетін ваучерлер санына қатысты мәселе әлі де ашық қалып отыр және бұл мәселе Білім басқармасының құзыретінде. Оқу-ағарту министрлігі олардың бөліну алгоритмін әзірлеуде.
«E-zhetysu QR» жүйесінің Қаржы орталығымен интеграциясы мәліметтердің нақтылығын қамтамасыз етіп, сыбайлас жемқорлық тәуекелдерін барынша азайтады және білім беру ресурстарын басқару тиімділігін арттырады. Бұл жүйенің енгізілуі – білім беру саласын цифрландыру және мемлекеттік қаржыландыру жүйесін жетілдіру жолындағы маңызды қадам.
