Тазалық – тек айналаны қоқыстан арылту емес. Ол – туған жерге деген құрметтің, қоршаған ортаға деген жауапкершіліктің көрінісі. Осыны қоғамның күнделікті дағдысына айналдыру мақсатында елімізде «Таза Қазақстан» жалпыұлттық экологиялық бастамасы жүйелі түрде жалғасып келеді.
19 қыркүйек – Дүниежүзілік тазалық күніне орай еліміздің барлық өңірінде жалпыхалықтық сенбілік ұйымдастырылды. Жетісу облысы да бұл игі бастамадан тыс қалған жоқ. Облыстың елді мекендерінде көшелер мен қоғамдық орындар тазаланып, аулалар мен саябақтар ретке келтіріліп, абаттандыру және көгалдандыру жұмыстары жүргізілді. Панфилов ауданында да тазалық шаралары ұйымдастырылып, аудан аумағын көркейтуге бағытталған жұмыстар атқарылды.
Сол күні Мемлекет басшысы Қасым-Жомарт Тоқаев Астанада өткен экологиялық акцияға қатысып, жастармен бірге ағаш отырғызды. Президент өз сөзінде тазалық пен табиғатты қорғаудың мәніне тоқталып, оның адамның туған жеріне деген сүйіспеншілігімен тікелей байланысты екенін айтты.
«Отанға, туған жерге деген сүйіспеншілік өз үйіңнен, өз ауылың мен қалаңнан бастау алады», – деді Қасым-Жомарт Тоқаев.
Бұл – «Таза Қазақстанның» негізгі идеясын дәл аңғартатын сөз. Өйткені туған жерге жанашырлық алыстан басталмайды. Ол өз аулаңнан, өз көшеңнен, өз ауылыңнан басталады.
Президент сондай-ақ табиғатты аялау, қоршаған ортаға қамқорлық жасау халқымыздың болмысында бар қасиет екенін атап өтті. «Біз экологиялық мәдениеті жоғары ел болуымыз керек», – деді Мемлекет басшысы.
Бұл сөз Панфилов ауданы үшін де маңызды. Өйткені аудан – табиғаты көркем, ауылдары мен елді мекендері бір-бірімен сабақтасқан үлкен аймақ. Жаркент қаласынан бастап ауылдық округтерге дейінгі әрбір елді мекеннің тазалығы – оның тұрғындарының ортақ жауапкершілігі.
Сенбілік кезінде көшелер мен қоғамдық орындарды ретке келтіру, арық-атыздарды тазалау, шашылған қоқыстарды жинау, арамшөптерді отау, ағаштардың түбін күтіп-баптау сияқты жұмыстар атқарылды. Мұндай шаралардың маңызы тек сол күні тазаланған аумақпен өлшенбейді. Ең бастысы – тұрғындардың туған жерге деген көзқарасын қалыптастыру.
«Таза Қазақстан» бастамасының мәні де осында. Тазалықты бір күндік сенбілікпен шектемей, күнделікті өмір салтына айналдыру.
Бүгінде Панфилов ауданында елді мекендерді абаттандыру мен санитарлық тазалыққа көңіл бөлініп келеді. Бұл жұмыстарға мемлекеттік мекемелермен бірге кәсіпорындар, ұйымдар, жастар, еріктілер және аудан тұрғындары атсалысуда.
Тазалық – бір адамның немесе бір мекеменің ғана міндеті емес. Ол – баршаға ортақ іс. Біреу көшені тазаласа, екіншісі ағаш отырғызады, енді бірі айналасына қоқыс тастамауға мән береді. Осындай қарапайым әрекеттер біріге келе үлкен мәдениетке айналады.
Президент айтқандай, туған жерге деген сүйіспеншілік өз үйімізден басталады. Ендеше, туған жеріміз – Панфилов ауданын таза әрі көрікті ұстау да әрқайсымыздың күнделікті әдетімізге айналуға тиіс. Таза көше, таза ауыл, таза аудан – ең алдымен өзімізге қажет.
«Таза Қазақстан» – бір күндік науқан емес, ортақ жауапкершілік.
Толқын ЕРБОЛҚЫЗЫ
