Қотыр – жұқпалы қышыма ауру. Ол денеге қотыр жұқтыратын кененің түсуінен пайда болады.
Қышыма сау адамға ауру адаммен тығыз қарым-қатынаста болғанда немесе ауру адам пайдаланған: киім-кешек, төсек-орын, ыдыс-аяқ, қол орамал, қолқап, шұлық, аяқ-киім т.б. заттарды бірге пайдалану арқылы жұғады. Сәбилерге қышыма өзін күтіп бағуға, тәрбиелеуге қатысы бар үлкен адамдардан жұғуы мүмкін. Қышыма адамға үй жануарларынан жұғуы да мүмкін. Аурудың инкубациялық кезеңі 8-14 күн аралығы.
Жетісу облысы бойынша 2024 жылдың 10 айында қышыманың 32 жағдайы тіркелді., оның ішінде 14 жасқа дейінгі бала саны 19 (59%). Былтырғы жылмен салыстырғанда сырқаттанушылық 5 жағдайға жоғарылаған.
«Қышыма ауруын жұқтырған кездегі алғашқы белгілері – қышу, бөртпе, іріндеп қабыршықтану. Қышыну кей адамда дуылдатып, шыдатпаса, кейбіреулерінде жеңіл өтеді. Қотырға тән белгінің бірі – адам денесінде қотырдың ізі қалуы, орны ақшыл-сұрғылт жолақтанып ине ұшының ізіндей, үтір тәрізді болады»,— дейді Жетісу облысы СЭБД басшысы Асхат Чарапиев.
Маманның айтуынша, қышыманың бөрткені балалардың алақаны мен саусақтарының арасында, іш аймағына, шынтақтың бүгілетін тері қатпарына, балтырына, өкшесіне, табанның ішкі жағына, құйрығына, иығына беті және басына шығады.
Сырқаттың алдын алу үшін:
- басқа адамдардың заттарын (баскиім, аяқкиім) пайдаланбау;
- сүлгі, бет орамалды ортақ қолданбау;
- табиғи матадан жасалған киімдерді таңдау;
- денсаулықты қадағалау және иммунитетті күшейту.
- денеде әртүрлі бөртпелер пайда бола бастаған кезде дереу дәрігерге қаралу керек.
