Жуырда Жаркент қаласының орталығындағы «Өркен» саябағында Жетісу облысы Полиция департаменті бастығының орынбасары, полиция полковнигі Жасұлан Құдайбергенұлы Бәйкенов қала әкімшілігі мен қоғамдық ұйымдардың басшыларымен, шаһар жұртшылығымен, қаладағы учаскелік полиция қызметкерлері және БАҚ өкілдерімен «Заң мен тәртіп. Таза Қазақстан» тақырыбында профилактикалық маңызы зор құқықтық кездесу іс-шарасын өткізді.
Жасұлан Құдайбергенұлы: «Бүгін біз сіздермен бірге қоғамдық қауіпсіздік, өзара ынтымақтастық және әр азаматтың жауапкершілігі туралы сөйлесу үшін жиналып отырмыз. Қазақстан полициясының басты міндеті-азаматтардың тыныштығы мен қауіпсіздігін қамтамасыз ету. Біз әрқашан халыққа жақын болуға, ашық жұмыс істеуге тырысамыз. Өйткені сіздердің қолдауларыңызсыз қауіпсіздікті сақтау мүмкін емес», – дей келе облыс және аудандағы құқықтық ахуалға қысқаша тоқталып өтті.
Айтуынша, Жетісу облысы және Жаркент қаласы бойынша 2024 жылмен салыстырғанда: барлық санаттағы қылмыс саны 10,7%-ға төмендеген. Оның ішінде ауыр қылмыс 8,4%, ауырлығы орташа дәрежедегі қылмыстар 20%, бөтеннің мүлкін ұрлау 36,6% және қоғамдық орындарда жасалған бұзақылық саны 26,7%-ға төмендеген. Соңғы айларда тұрмыстық жанжалдарды, жасөспірімдер арасындағы құқықбұзушылықты және жол-көлік оқиғаларының алдын алу мақсатындағы профилактикалық шаралар атқарылып жатқаны айтылды. Құқық бұзушылықтың алдын алу, күресті күшейту мақсатында Панфилов ауданында жыл соңына дейін барлығы 23 бекет 90-нан астам бейне бақылау және көліктердің жылдамдығын өлшейтін камералар орнатылуы өз кезегінде қоғамдық қауіпсіздікті сақтауға өз септігін тигізетіні туралы баяндады.
Сонымен бірге Үсек өзені жағалауында, саябақтарда, демалыс орындарында және адамдар көп жиналатын жерлерде қоғамдық тәртіпті қамтамасыз ету, санитарлық және экологиялық тазалықты сақтау шаралары қала әкімшілігі мен белсенді азаматтардың тарапынан қоғамды жұмылдырумен жүзеге асып жатқанына департамент басшылығы атынан өз ризашылығын білдірді. «Заң мен тәртіп», «Халыққа жақын полиция», «Таза Қазақстан» қағидаттарын басты ұстаным еткен полиция қызметінің қолжетімді, ашық әрі адал болуы және құқықбұзушылық пен қылмысқа жол бермеуді өздерінің кәсіби һәм абыройлы міндеттері екенін көпшілікке жеткізді.
Ұрпақтар сабақтастығын сақтау және жастарға өнеге көрсету жолында белсенді жұмыс атқарып, медиатор ретінде қоғамдағы дау-жанжалдардың алдын алып, тараптарды келісімге келтіруде үлкен рөл атқарғаны, қоғамдық тәртіп мәселесіне назар аударып қала азаматтарына үлгі болғаны және қоғамдық тәртіпті сақтау шараларына тұрақты түрде көмек көрсеткені үшін Жаркент қалалық ардагерлер Кеңесінің төрағасы, медиатор Р.Тұрлыбаевқа, қалалық қоғамдық Кеңесінің мүшесі, жігітбасы А.Ташметовке, славян мәдени орталығы төрайымының орынбасары Л.Першинаға Жетісу облысы ІІД бастығы, полиция генерал-майоры С.Құсайыновтың «Алғыс хаттарын» департамент өкілі Жасұлан Құдайбергенұлы салтанатты жағдайда табыстап, оларға ізгі лебізін білдірді.
Сондай-ақ ол «Таза Қазақстанның» әрқайсысымыздың жүрегімізден басталатын ізгілікті іс, таза қала, таза табиғат – ол тек қоршаған ортаның ғана сұлулығы емес, біздің ішкі мәдениетіміз бен жауапкершілігіміздің көрінісі екенін, тазалық – денсаулықтың, тәртіп пен қауіпсіздіктің кепілі екенін атап көрсетті. Әрбір азамат өз ауласын таза ұстаса, құқық бұзушылыққа жол бермесе бүкіл ел жаңаратыны, қолайлы орта қалаптасатыны һәм Жаңа Әділетті Қазақстан құрылатыны аян.
Қатысушылар тарапынан, қалада жол-көлік оқиғаларынан адам өлімі мен мүгедектікке ұшырау оқиғалары жиілеп кеткені мен инфрақұрылымдарды ауыр жүк көліктерінің бұзуы қалыпты жағдайға айналғаны, санитарлық тазалықты сақтау, қауіп жоғары жолдарда жол белгілерін орнату, аталған құқық бұзушылықтар бойынша полиция жұмысын жандандыру мәселелері өте орынды көтерілгенін, олар бойынша ІІД тарапынан кешенді шаралар қарастырылатыны, ұсыныстардың назарға алынып, қолдау табатыны департамент өкілі тарапынан айтылды. Аталған профилактикалық шаралар құзырлы органдар тарапынан белсенді түрде жүзеге асатын болса Жаркент қаласында «Заң мен тәртіп», «Таза Қазақстан», «Халыққа жақын полиция» қағидаттары бойынша жұмыстар оң нәтиже береді деп сенеміз.
