ҚР Еңбек және әлеуметтік қорғау министрлігінің ақпараттық-түсіндіру тобы өткен аптада жазиралы Жаркент өңіріне келіп, Президенттің халыққа Жолдауының және жаңа Әлеуметтік кодекс жобасының негізгі бағыттары бойынша өңірдегі округ әкімдерімен, білім беру мен денсаулық сақтау мекемелерінің басшыларымен, құқық қорғау, салық және АХАЖ органдары жүйесінің қызыметкерлерімен кездесіп, ақпараттық түсіндіру жиынын өткізді. Жиынды аудан әкімі Марат Сағымбек кіріспе сөз сөйлеп ашып, Астанадан, облыс орталығынан келген қонақтарды таныстырып, бұл басқосудың маңызы мен мақсатын айтып өтті.
Жиында ҚР Еңбек және әлеуметтік қорғау министрінің орынбасары Назгүл Сағындықова Президент Жолдауы мен қабылданғалы отырған Қазақстан Республикасы Әлеуметтік кодексінің негізгі бағыттарын талдап, түсіндіріп баяндама жасады. Баяндамашының айтуынша жаңа Әлеуметтік кодекске ел тұрғындары тарапынан мыңнан астам ұсыныстар түсіп, 80-нен астам заңға өзгерістер енгізіліп, 10 заң күшін жойған. Жаңа кодекстің басты бағыты мықты отбасы, мықты мемлекет принципіне негізделген. Кодексте отбасының әлеуметтік цифрлық картасын жасау, «Ұлттық қор – балаларға» бағдарламасын жүзеге асыру, мүгедектікті сырттай тағайындау, арнаулы әлеуметтік көмекті модернизациялау, сәби күтіміне берілетін уақытты бір жарым жылға ұзарту, зейнетақыны жүйелеу жөнінде, тағы басқа да халықтың тұрмыс-тіршілігіне қолайлы жағдайлар жасау тетіктері қарастырылғаны арнаулы бейне карта арқылы түсіндірді.
Баяндамашыға залдан көптеген халықты толғандырған мәселелер жөнінде сұрақтар мен ұсыныстар беріліп, оларға Назгүл Ерікқызы тиянақты, түсінікті жауап берді. Жиын соңында кездесуге келгендерге министрлік шығарған «Қазақстан Республикасы Әлеуметтік кодексі» ақпараттық- әдістемелік түсіндіру кітапшалары таратылды.
Мырзағали НҰРСЕЙІТ
