Жаркент қаласындағы отыз жылдан астам уақыттын бері орталықтандырылған жылу жүйесінен ажыратылған 13 көп қабатты тұрғын үйдегі 682 пәтерде тұратын отбасы қыс маусымында үйіне жеке-жеке пеш орнатып, сырттан оған жағатын көмір, тамызық тасып, күнде сыртқа күл-қоқыс шығарып қиындық көріп келіп еді.
Биыл Панфилов аудандық Тұрғын үй коммуналдық шаруашылығы мен Тұрғын үй инспекциясы бірігіп, арнайы жоба дайындап, блокті-мобильді 6 қазандықтың құрылысын аяқтап, жаңа жылылту маусымының қарсаңында пайдалануға берді.
– Қазандықтардың құрылысын «Jetisy enerj» ЖШС кәсіпорыны атқарып, мемлекеттік жекеменшік серіктестік бағдарламасымен жасады. Жобаға 944 миллион 634 мың теңге жұмсалды. Бұл қазандықтардың бәрі газбен жылытады, – дейді аудандық Тұрғынүй коммуналдық шаруашылық басшысы Арман Тазабеков.
Жаркент қаласындағы тұрғындардың 80 пайыздан астамы үйлерін газбен жылыту жүйесіне көшірілген. Кейбір білім беру мен денсаулық сақтау мекемелері де газбен жылытуға ауыса бастады. Көп қабатты тұрғын үйлер де әрқайсысы терезесінен түтін будақтатудан тыйылып, қала халқы қыс маусымында таза ауамен тыныстайтынына қуанышты.
Мырзағали НҰРСЕЙІТ
