Жаркент қаласында тұрғындарды қолжетімді баспанамен қамту бағытындағы маңызды жобалардың бірі жүзеге асып, таунхаус үлгісіндегі жаңа тұрғын үй кешені пайдалануға берілді. Бұл бастама тұрғын үй нарығына тың серпін беріп қана қоймай, аудан тұрғындарының баспана мәселесін шешуге қосымша мүмкіндік ұсынып отыр.
Жаңа кешеннің басты ерекшелігі – тұрғын үйлердің жеке кәсіпкерлердің қаржысына салынуы және оларды тұрғындардың өз мүмкіндігіне қарай сатып ала алуында. Атап айтқанда, баспаналарды екінші деңгейлі банктер арқылы ипотекалық несиеге рәсімдеуге, бөліп төлеу арқылы алуға немесе дайын қаражатқа сатып алуға болады.
Таунхаус үлгісіндегі тұрғын үйлер екі қабаттан тұрады. 2, 3 және 4 бөлмелі баспаналар көпбалалы отбасылардың қажеттіліктерін ескере отырып жобаланған. Әрбір үйге арнайы автотұрақ қарастырылған, жеке қойма бөлмесі бар. Сонымен қатар, әр баспананың мемлекеттік тіркеуден өтетін жеке меншік құқығы қарастырылған. Болашақ қоныстанушылар үйдің ішкі әрлеуі мен дизайнын өз талғамына сәйкес таңдай алады.
Жоба аясында салынған алғашқы алты баспананың иелеріне салтанатты түрде үй кілттері табысталды. Қоныс тойын тойлаған отбасылар жаңа үйлердің жайлылығы мен қолайлылығын ерекше атап өтті.
Мамандардың айтуынша, мұндай тұрғын үй кешендері аудан тұрғындары арасында үлкен сұранысқа ие. Сондықтан алдағы уақытта халықтың қажеттілігіне қарай осы үлгідегі үйлердің санын көбейту жоспарланып отыр. Жаңа баспаналар нарықтағы баға деңгейіне сәйкес сатылымға шығарылып, тұрғындарға қолжетімді шарттармен ұсынылады.
Бүгінде ауданда баспана кезегінде тұрған азаматтардың саны жыл сайын артып келеді. Осыған байланысты мемлекеттік бағдарламалармен қатар, жеке кәсіпкерлердің бастамасымен жүзеге асырылып жатқан тұрғын үй жобаларының маңызы зор. Мемлекеттік қолдау тетіктеріне ұқсас шарттармен ұсынылатын мұндай жобалар тұрғындардың баспаналы болуына қосымша мүмкіндік беріп, өңірдегі әлеуметтік мәселелерді шешуге оң ықпал етуде.
Таунхаус үлгісіндегі тұрғын үйлердің пайдалануға берілуі – ауданның тұрғын үй қорын ұлғайтуға және халықтың өмір сүру сапасын жақсартуға бағытталған нақты қадамдардың бірі.
