Панфилов ауданында волейболдан 2012-2013 жылы туған жасөспірім ұлдар арасындағы Жетісу облысының чемпионаты өз мәресіне жетті. 2026 жылдың 13-17 мамыр күндері аралығында өткен облыстық біріншілік жас спортшылардың шеберлігін шыңдап, тартысқа толы ойындарымен көрермен көңілінен шықты.
Дүбірлі додаға Жетісу облысының әр өңірінен келген 6 команда қатысып, 80-ге жуық жас волейболшы бақ сынады. Жарыс барысында командалар өзара мықтыны анықтап, ойыншылар жоғары дайындық пен нағыз спорттық мінез көрсете білді. Әсіресе, шешуші кездесулерде жас спортшылардың жеңіске деген жігері мен алаңдағы ұйымшылдығы көпшіліктің ыстық ықыласына бөленді.
Төрт күнге созылған тартысты бәсекенің қорытындысы бойынша Панфилов-1 командасы қарсыластарына дес бермей, чемпион атанды. Ал Панфилов-2 құрамасы күміс жүлдені иеленсе, Талдықорған қаласының СДЮШОР-1 командасы қола жүлдегер атанды.
Айта кетерлігі, мұндай жарыстар жасөспірімдердің спортқа деген қызығушылығын арттырып қана қоймай, олардың тәжірибе алмасуына, шеберлігін шыңдауына зор мүмкіндік береді. Сонымен қатар, бұқаралық спортты дамыту мен салауатты өмір салтын насихаттауда да маңызы ерекше.
Жарыс соңында жеңімпаздар мен жүлдегерлер арнайы марапатталып, ұйымдастырушылар барлық қатысушылар мен жаттықтырушыларға алғыс білдірді. Сондай-ақ, жас спортшыларға алдағы жарыстарда биік белестерді бағындырып, толағай табысқа жетуге тілектестік білдірілді.
