Жастар табиғат жанашырына айналуда

Президент бастамасымен қолға алынған «Таза Қазақстан» экологиялық акциясы Панфилов ауданында қарқынды жүзеге асырылуда. Әсіресе аудан орталығы Жаркент қаласында және барлық ауылдық округтерде тазалық жұмыстары апта сайын тұрақты түрде ұйымдастырылып келеді. Бұл жұмыстарға жастардың белсенді қатысуы көңіл қуантады.

Бүгінде ауыл жастары көшелерді, саябақтарды, арық-атыздар мен қоғамдық орындарды тазалауға атсалысып қана қоймай, ағаш көшеттерін отырғызу жұмыстарына да белсенді түрде қатысып жүр. Мұндай игі шаралар жастардың туған жерге деген сүйіспеншілігін арттырып, экологиялық мәдениеттің қалыптасуына оң әсер етуде.

Тазалық жұмыстарының жүйелі жүргізілуі нәтижесінде аудан аумағында тазалық пен тәртіпке деген жауапкершілік артып келеді. Әсіресе жас буынның белсенділігі өзгелерге үлгі болып, тұрғындарды табиғатты аялауға үндеп отыр. Бұл – «Таза Қазақстан» акциясының басты жетістіктерінің бірі.

Жастардың табиғатты қорғау ісіне араласуы – ел болашағына деген жанашырлықтың белгісі. Себебі қоршаған ортаның тазалығы мен көркеюі әр адамның мәдениеті мен азаматтық жауапкершілігін көрсетеді. Панфилов жастары осы бағытта белсенділік танытып, туған өлкенің көркеюіне өз үлестерін қосуда.

Жомарт ҚОНЫСБАЕВ,

Панфилов аудандық Ішкі саясат бөлімінің басшысы