2025 жылдың 1 қыркүйегінен бастап білім беру ұйымдарында жаңа тамақтану стандарты енгізіледі. Бұл өзгеріс Қазақстан Республикасы Үкіметінің 2025 жылғы №320 қаулысындағы өзгерістерге сәйкес білім беру ұйымдарында оқушыларды тамақтандыруды ұйымдастыру талаптарына бірқатар жаңашылдықтар орын алды. Осындай ақпаратпен Білім басқармасы басшысының орынбасары Әли Солтанбеков пен Жетісу облысы санитариялық-эпидемиологиялық бақылау департаменті басшысы Асхат Чарапиев бөлісті.
Облыстық денсаулық сақтау басқармасы мен санитариялық-эпидемиологиялық бақылау департаментінің бірлескен жұмысының нәтижесінде балалардың жас ерекшеліктері мен физиологиялық қажеттіліктеріне бейімделген жаңартылған ас мәзірі әзірленді.
Жаңа стандартта ақуыздар, майлар мен көмірсулардың оңтайлы арақатынасы, сондай-ақ дәрумендер мен микроэлементтердің құрамы ескерілген ғылыми негізделген ас мәзірі қарастырылған. Сондай-ақ, перспективалы төрт апталық маусымдық мәзір жасалады.
Мәзірден газдалған сусындар, чипсы, фастфуд өнімдері, майонез, маргарин және басқа да зиянды тағамдар алынып тасталды. Қант пен тұз тұтыну деңгейі шектеліп, күнделікті көкөніс пен жеміс-жидек пайдалану нормалары енгізілді.
Рационға ет, балық және құс етінен дайындалған тағамдар, сүт өнімдері мен компоттар енгізілді. Дайындау барысында қайнату, бұқтыру, пісіру және буға пісіру секілді үнемді тәсілдер қолданылады.
Тағамдық аллергиясы бар, сондай-ақ глютен мен лактозаны көтере алмайтын балалар үшін арнайы диеталық мәзірлер қарастырылған. Мектептерде әкімшілік, медицина қызметкерлері және ата-аналар комитеттері өкілдері қатысатын бракераждық комиссиялар жұмыс істеп, тамақ сапасына тұрақты бақылау жүргізіп, қанағаттанушылық мониторингін қамтамасыз етеді.
Жетісу облысының тұрғындары мектеп асханаларындағы бұзушылықтар туралы «E-Өтініш» порталы арқылы фото немесе бейнематериалдарды қоса тіркей отырып хабарлай алады.
