Президент Қасым-Жомарт Тоқаев Қазақстан халқына Жолдауында еліміздің Еуразия кеңістігіндегі негізгі көлік хабы ретіндегі орнын нығайту мәселесіне ерекше тоқталды. Мемлекет басшысы көлік инфрақұрылымын дамыту, әуежайлар құрылысын жүргізу және халықаралық транзиттік тасымалдарды жетілдіру бағытында атқарылып жатқан жұмыстар мен алдағы жоспарларды атап өтті.
Президенттің айтуынша, қазір елімізде бірнеше әуежайдың құрылысы қатар жүргізіліп жатыр. Мұндай ауқымды жобаларды бір мезгілде жүзеге асыру Қазақстан тарихында бұрын-соңды болмаған. Арқалықтағы әуежайды қалпына келтіру жұмыстары аяқталған. Алдағы уақытта Зайсан, Катонқарағай және Кендірлі әуежайларын іске қосу көзделіп отыр. Сонымен қатар келесі жылы әлемдегі ірі компаниялардың бірін тарта отырып, Астанада жаңа әуежай құрылысын бастау жоспарланған.
Мұның бәрі еліміздің көлік-логистикалық мүмкіндіктерін кеңейтіп, халықаралық бағыттардағы тасымал көлемін арттыруға жол ашады. Еуразияның ортасында орналасқан Қазақстан үшін транзиттік әлеуетті тиімді пайдалану – экономиканы дамытудың маңызды бағыттарының бірі. Еуропа мен Азияны жалғайтын көлік дәліздерінің дамуы сауда-саттықты жандандырып қана қоймай, жаңа жұмыс орындарының ашылуына, отандық кәсіпкерліктің өркендеуіне де ықпал етеді.
Мемлекет басшысы бұл міндеттерді орындау үшін көлік саласын, соның ішінде халықаралық бағыттарды толық цифрландыру қажеттігін атап өтті. Жасанды интеллект дәуірінде жаһандық транзит ағындарын қағаз жүк құжаттары арқылы басқару тиімсіз екенін айтқан Президент заманауи технологияларды кеңінен енгізудің маңызын жеткізді. Көлік қатынастарын цифрландыру жүк қозғалысын бақылауды жеңілдетіп, уақытты үнемдеуге, құжат айналымын жеделдетуге және тасымалдардың ашықтығын арттыруға мүмкіндік береді.
– Логистика инфрақұрылымын дамытуға баса мән беру қажет. Бұл – еліміздің өсіп-өркендеуіне ықпал ететін маңызды фактордың бірі. Қазіргі таңда логистика мәселесімен барлық елдер айналысуда. Дамыған көлік логистикасы болмаса, тіпті, бүгінгі күшті ел ертең құрдымға кетеді, – деді Қасым-Жомарт Тоқаев.
Бұл міндеттердің Панфилов ауданы үшін де маңызы зор. Қытаймен шекаралас орналасқан ауданымыз халықаралық сауда мен транзиттік қатынастардың дамуында өзіндік орын алады. «Қорғас» шекара маңы ынтымақтастығы халықаралық орталығы, «Алтынкөл» теміржол өткелі және құрғақ порт арқылы жүзеге асатын жүк тасымалдары өңірдің экономикалық әлеуетін арттыруға ықпал етіп келеді. Сондықтан еліміздің көлік инфрақұрылымын жаңғыртуы мен халықаралық тасымалдарды цифрландыруы Жетісу облысы мен Панфилов ауданының дамуына да тың серпін беруі мүмкін.
Қазақстанның Еуразиядағы негізгі көлік хабына айналуы тек ірі әуежайлар мен теміржол желілерін салумен шектелмейді. Ол үшін шекаралық өткелдердің тиімді жұмыс істеуі, жүк тасымалының жылдамдығы, заманауи логистикалық қызметтер және цифрлық технологиялардың қолжетімділігі қатар дамуы қажет. Осындай жұмыстар жүйелі түрде жүзеге асқанда ғана еліміздің географиялық орналасуы нақты экономикалық артықшылыққа айналып, оның игілігі өңірлер мен халықтың тұрмысынан көрініс табады.
Қали Ибрайымжанов,
«Жаркент айнасы» газеті бас редакторының
орынбасары, тарихшы, өлкетанушы
