15 мамыр – Халықаралық отбасы күніне орай Панфилов аудандық кітапханасының ұйымдастыруымен тағылымы мол, тәрбиелік мәні зор «Берекелі шаңырақ – бақытты отбасы» атты әсерлі кездесу кеші өтті. Тағылымды шараның басты қонағы – ауданға үлгілі, көпбалалы әрі өнегелі отбасылардың бірі саналатын Молдабековтар әулеті болды.
Кештің негізгі мақсаты – отбасы құндылығын дәріптеу, жанұядағы сыйластық пен татулықтың маңызын насихаттау, сондай-ақ жас ұрпаққа ұлттық тәрбие мен адамгершілік қасиеттерді үлгі ету.
Шара барысында отбасының қоғамдағы орны, ата-ана қадірі, ұрпақ тәрбиесі, шаңырақтағы бірлік пен берекенің мәні жайлы тағылымды әңгімелер өрбіді. Молдабековтар отбасы өздерінің өмірлік тәжірибелерімен бөлісіп, ынтымағы жарасқан отбасының басты құндылығы – өзара құрмет, түсіністік пен мейірім екенін ерекше атап өтті.
Кездесу кешінде ұлттық салт-дәстүр, отбасылық тәрбие, үлкенге құрмет, кішіге ізет секілді асыл құндылықтар кеңінен сөз болып, қатысушылар арасында еркін пікір алмасу ұйымдастырылды. Кеш қонақтары да отбасы тақырыбындағы жүрекжарды лебіздерін білдіріп, өмірден алынған әсерлі естеліктерімен бөлісті.
Жылы әрі рухани атмосферада өткен кеш көпшілік көңілінен шығып, отбасы бақыты мен берекелі тіршіліктің қадірін ұғындырған мазмұнды шараға айналды.
Сонымен қатар кештің көркін әріптестеріміз Смағұл Елерке, Скакова Мадина және Аязбекова Ақеркенің әуелете шырқаған әсем әндері аша түсті. Ән мен әңгіме үндескен тағылымды кеш қатысушыларға көтеріңкі көңіл күй сыйлап, көптің жүрегінде ерекше әсер қалдырды.
Ақерке АЯЗБЕКОВА,
Панфилов ауданының
Аудандық кітапханасы
