Биыл құрылыс басқармасының бюджеті 59 млрд теңгеге жетіп, алғашқы үш айдың қорытындысы бойынша қаражаттың 99%-ы сәтті игерілді. Жыл соңына дейін өңірде 67 әлеуметтік және инфрақұрылымдық нысанды іске қосу жоспарлануда. Бұл туралы Жетісу облысы Құрылыс басқармасы басшысының орынбасары Санжар Қабдыбек айтып берді.
Құрылыс жұмыстарын қаржыландыру бірнеше көзден жүзеге асырылып жатыр. Ең үлкен үлес жергілікті бюджетке және республикалық бюджетке тиесілі. Сондай-ақ, денсаулық сақтау саласы мен білім беру инфрақұрылымын қолдауға арналған арнайы мемлекеттік қорлардан қомақты қаражат бөлінді.
2026 жылы жалпы саны 71 нысанның құрылысы мен 21 жобалау жұмыстары жүргізілуде. Жыл соңына дейін тапсырылуы тиіс 67 нысанның ішінде: 12 тұрғын үй және 27 инженерлік-коммуникациялық желі, 12 денсаулық сақтау нысаны, 6 мектеп және 6 мәдениет үйі, 1 спорт кешені, 1 өрт сөндіру бекеті және 2 ауыл шаруашылығы нысаны.
Сондай-ақ, Көксу ауданы, Балпық би кентіндегі жаңа өрт сөндіру бекеті толықтай аяқталып, пайдалануға берілді.
Басқарма алдағы кезеңге 109 млрд теңгеге қосымша бюджеттік өтінім жолдады. Бұл қаражаттың басым бөлігі 11 жаңа мектеп салуға және 4 мектепті күрделі жөндеуге бағытталмақ. Сондай-ақ, тұрғын үй құрылысы мен сатып алуға сұратылып отыр.
Құрылыс басқармасы алдағы уақытта энергия тиімді технологияларды қолдануға және жұмыс сапасын қатаң бақылауға басымдық бермек.
