23 маусым – Мемлекеттік қызметшілер күніне орай облыстық әкімдікте салтанатты жиын өтті. Мерекелік шарада өңірдің әлеуметтік-экономикалық дамуына үлес қосып жүрген мемлекеттік қызметшілердің еңбегі еленіп, үздіктер марапатталды.
Жиында сөз сөйлеген облыс әкімі Бейбіт Исабаев мемлекеттік қызметтің қоғам өміріндегі айрықша маңызына тоқталды.
– Облыс құрылғаннан бері өздеріңізбен бірге өңірдің әлеуметтік-экономикалық дамуы, халықтың әл-ауқатын арттыру бағытында жүйелі жұмыстар атқарып келеміз, – деген өңір басшысы соңғы төрт жылда қол жеткізілген нәтижелерге тоқталды.
Расында, Жетісу облысы құрылған уақыттан бері өңір экономикасында оң серпін қалыптасты. Жалпы өңірлік өнім көлемі 2,5 триллион теңгеге жетіп, 2022 жылмен салыстырғанда екі есеге жуық өсті. Экономикаға 611 миллиард теңге инвестиция тартылып, құрылыс жұмыстарының көлемі 10 пайызға артты. Өткен жылы 413 мың шаршы метр тұрғын үй пайдалануға берілді.
Облыстағы инфрақұрылымдық жобалардың да ауқымы кеңейіп келеді. Бүгінде халықты орталықтандырылған ауыз сумен қамту деңгейі 99,9 пайызға жетсе, газдандыру көрсеткіші 67 пайызды құрайды. Жергілікті маңызы бар автомобиль жолдарының 95 пайызы жақсы және қанағаттанарлық жағдайға жеткізілген. Әлеуметтік нысандарды жаңарту деңгейі 55,8 пайызды құрап, 276 нысан жаңғыртылған.
– Мұндай жетістіктерде сіздердің әрқайсыларыңыздың үлестеріңіз бар, – деді облыс әкімі мемлекеттік қызметшілерге алғысын білдіріп.
Салтанатты жиында мемлекеттік қызмет саласындағы реформалардың нәтижелері де айтылды. Соңғы жылдары мемлекеттік аппараттың кәсібилігін арттыруға, ашықтықты қамтамасыз етуге және жастарды мемлекеттік қызметке қатыстыруға басымдық беріліп келеді. Соның нәтижесінде 2023 жылдан бері жоғары оқу орындарын үздік аяқтаған 58 түлек жергілікті жерлерде мемлекеттік қызметке конкурссыз қабылданған. Өңірлік кадр резервіне алынған 20 жас қызметшінің 11-і бүгінде түрлі деңгейдегі лауазымдарды атқарып жүр.
Облыс басшысы өз сөзінде 1 шілдеден бастап күшіне енетін «Қазақстан Республикасының мемлекеттік қызметі туралы» жаңа заңға да тоқталды.
– Мемлекеттік аппараттың кәсібилігін арттыру бағытындағы бұл заң кадрлық саясаттың жаңа стандартын қалыптастыруды көздейді. Сонымен қатар заңда мемлекеттік қызметшілердің әлеуметтік қорғалу мәселелеріне ерекше назар аударылған, – деді Бейбіт Исабаев.
Шара барысында мемлекеттік қызметке алғаш рет тағайындалған жас мамандар ант қабылдап, халыққа адал қызмет етуге серт берді. Сондай-ақ көпжылдық мінсіз еңбегімен ерекшеленген қызметкерлерге ведомстволық марапаттар, «Мемлекеттік қызмет ардагері» және «Үздік мемлекеттік қызметші» төсбелгілері, бірқатар азаматқа облыс әкімінің Құрмет грамоталары және Алғыс хаттары табысталды.
Марапатталғандардың қатарында Алакөл ауданы, Ырғайты ауылдық округі әкімі аппаратының бас маманы Жандос Сақаев та бар. Ол биыл маусым айында Алакөл көлінде орын алған төтенше жағдайда суға кетіп бара жатқан Ресей Федерациясының төрт азаматын құтқарып, батылдық пен азаматтық жауапкершіліктің жарқын үлгісін көрсеткен болатын. Осы ерлігі үшін оған облыс әкімінің Құрмет грамотасы табысталды.
Мемлекеттік қызметтегі еңбек жолын облыстық жер қатынастары басқармасынан бастаған Жандос Нұрғазыұлы бүгінде туған жеріндегі ауылдық округ әкімдігінде еңбек етіп келеді. Оның айтуынша, мемлекеттік қызмет – халық сенімін ақтауға негізделген жауапты сала.
– Мемлекеттік қызметші ең алдымен өз ісіне адал, төзімді және шыншыл болуы керек. Өйткені әрбір қабылданған шешім мен атқарылған жұмыс тұрғындардың өміріне тікелей әсер етеді. Халықтың сенімін сақтау – біздің басты міндетіміз, – дейді ол.
Мемлекет басшысы ұсынған «Заң мен тәртіп», «Адал азамат – Адал еңбек – Адал табыс», «Таза Қазақстан» қағидаттарын басшылыққа ала отырып, мемлекеттік қызметшілер өңірдің өркендеуіне қызмет етуді жалғастыруда. Ал мерекелік жиын олардың еңбегіне көрсетілген құрметтің және мемлекеттік қызметтің қоғам үшін маңызын айқындайтын тағылымды басқосудың біріне айналды.
Сарби ӘЙТЕНОВА
