Қазіргі қоғам алдында тұрған ең өзекті мәселелердің бірі – жас ұрпақты есірткіден қорғау. Өкінішке қарай, жеңіл табысқа құмарлық пен теріс ортаның ықпалы кейбір жастарды қауіпті жолға жетелеп, олардың өміріне ғана емес, отбасының тағдырына да ауыр зардап әкелуде. Сондықтан бала тәрбиесіне бейжай қарамай, өскелең ұрпаққа есірткінің зияны туралы үнемі түсіндіріп отыру – әрбір ата-ана мен қоғамның ортақ міндеті.
Жетісу облысында жыл басынан бері жүргізілген жедел-қызметтік жұмыстардың қорытындысы бұл мәселенің өзектілігін тағы бір мәрте көрсетті. Облыста есірткінің заңсыз айналымына байланысты 79 құқық бұзушылық тіркелген. Оның ішінде 42-сі есірткі қылмысы ретінде сараланған.
Тіркелген құқық бұзушылықтардың ішінде есірткі өткізудің 30 фактісі, аса ірі мөлшерде сақтаудың 6 фактісі, есірткі заттарын насихаттау мен жарнамалаудың 3 жағдайы анықталған. Сонымен қатар шегілмейтін темекі бұйымдары мен электрондық шылымдардың заңсыз айналымына қатысты деректер де тіркеліп отыр. Ең алаңдатарлығы – өңірде есірткі өндірудің екі фактісінің әшкереленуі.
Жыл басынан бері заңсыз айналымнан 101 келі 488 грамнан астам түрлі есірткі заттары тәркіленген. Бұл – жүздеген адамның өмірін улауы мүмкін қауіпті заттардың жолы кесілді деген сөз. Заңсыз әрекеттері үшін 17 жастан 54 жасқа дейінгі 49 адам ұсталып, олардың бесеуі есірткі жасырушы болған. Қазіргі уақытта ондаған қылмыстық іс сотқа жолданған.
Бұл сандар жай ғана статистика емес. Әрбір деректің артында адасқан тағдырлар, көз жасына қалған ата-аналар, болашағынан айырылған жастар тұр. Есірткінің ең қауіпті тұсы – оның адам өміріне бірден емес, біртіндеп енуінде. Бастапқыда қызығушылықпен басталған әрекет кейін тәуелділікке, ал тәуелділік қылмыс пен қайғыға алып келеді.
Сондықтан баламен ашық сөйлесу, оның ортасына көңіл бөлу, бос уақытын тиімді ұйымдастыру және интернеттегі әрекеттерін назардан тыс қалдырмау бүгінгі күннің маңызды талаптарының біріне айналып отыр. Кейде ата-ананың бір ауыз жылы сөзі мен уақытылы берген ақылы баланы үлкен қатерден сақтап қалуы мүмкін.
Мамандар да бұл бағыттағы профилактикалық жұмыстарды күшейтіп келеді. 26 маусым – Халықаралық нашақорлыққа және есірткінің заңсыз айналымына қарсы күрес күні қарсаңында Жетісу облысында кешенді іс-шаралар жоспары әзірленген. Жазғы демалыс кезеңінде мектеп жанындағы және қала сыртындағы сауықтыру лагерьлерінде балаларға арналған тақырыптық кездесулер, интерактивті дәрістер мен тренингтер өткізу көзделген.
Сонымен қатар педагогтар, тәлімгерлер мен әлеуметтік қызметкерлер үшін жасөспірімдер арасындағы тәуелділіктің алғашқы белгілерін анықтауға арналған арнайы семинарлар ұйымдастырылмақ. Мұндай шаралар жастарды зиянды әдеттерден сақтандыруға және қоғамдағы есірткіге қарсы иммунитетті қалыптастыруға бағытталған.
Халқымыз «Бала – бауыр етің» дейді. Ендеше әрбір ата-ана перзентінің жүріс-тұрысына, достарына, қызығушылықтарына бейжай қарамауы керек. Есірткімен күрес тек полицияның немесе дәрігерлердің ғана міндеті емес. Бұл – отбасыдан басталатын, бүкіл қоғам болып атсалысатын ортақ іс.
Бүгінгі жас ұрпақ – ертеңгі ел тірегі. Сондықтан олардың санасына салауатты өмір салтын сіңіріп, зиянды әрекеттерден аулақ болуға тәрбиелеу – келешек алдындағы жауапкершілігіміз. Есірткі ешқашан бақытқа бастамайды. Ол адамның денсаулығын, арманын, болашағын құртады. Сондықтан жастарымызды бұл індеттен қорғау – баршамыздың парызымыз.
