«Таза Қазақстан» экологиялық бағдарламасы аясында Жетісу облысында орман қорын қорғау, табиғи байлықтарды сақтау және орман өрттерінің алдын алу бағытындағы жұмыстар жүйелі түрде жүргізілуде. Табиғат – болашақ ұрпаққа аманат. Сондықтан орман алқаптарын сақтап, олардың қауіпсіздігін қамтамасыз ету бүгінгі күннің маңызды міндеттерінің бірі болып отыр.
Жетісу облысындағы мемлекеттік орман қоры жерлерінің жалпы аумағы 1,5 миллион гектарды құрайды. Оның ішінде 340,2 мың гектары орманды алқаптар санатына жатады. Өңірдің табиғи байлығын қорғау және күзету жұмыстарын жеті орман шаруашылығы мекемесі жүзеге асырады. Бұл мекемелер орман қорын сақтаумен қатар, өрт қаупінің алдын алу, орман алқаптарын бақылау және экологиялық қауіпсіздікті қамтамасыз ету бағытында тұрақты жұмыс жүргізіп келеді.
Әсіресе жаз мезгілінде орман өрттерінің қаупі арта түсетіні белгілі. Осыған байланысты өңірде алдын алу шаралары күшейтіліп, арнайы техникалар мен мамандар жоғары дайындық жағдайына көшірілген. Табиғи апаттардың алдын алу және төтенше жағдайларға жедел әрекет ету мақсатында облыс аумағында 11 өрт сөндіру станциясы тәулік бойы қызмет көрсетуде. Бұл станциялар орман өрттері орын алған жағдайда оқиға орнына жедел жетіп, тілсіз жаудың кең аумаққа таралуына жол бермеуге мүмкіндік береді.
Биыл облыс аумағында жалпы ауданы 115,5 гектарды қамтыған 6 орман өрті тіркелген. Төтенше жағдайлар қызметтері мен орманшылардың үйлесімді әрекетінің арқасында өрттер дер кезінде оқшауланып, ірі экологиялық зардаптардың алдын алу мүмкін болды. Дегенмен табиғатқа келтірілген материалдық шығын көлемі 2,1 миллион теңгені құрады.
Орман алқаптарын қорғауда «Қазавиаорманқорғау» РМК Талдықорған авиациялық бөлімшесінің де үлесі зор. Әуеден бақылау жүргізу арқылы өрт ошақтары ерте анықталып, жедел шара қабылдауға мүмкіндік жасалады. Бұл өз кезегінде табиғи ресурстарды сақтауға және экологиялық тепе-теңдікті қамтамасыз етуге ықпал етеді.
Бүгінде облыстың орман шаруашылығы мекемелері қажетті техникамен толық қамтамасыз етілген. Дайындық қорында 17 өрт сөндіру автокөлігі, 4 кіші кешенді өрт сөндіру көлігі, 3 шынжыр табанды және 45 дөңгелекті трактор бар. Сонымен қатар орман алқаптарын бақылау үшін 85 патрульдік автокөлік, 77 мотоцикл, 3 квадроцикл және жетуі қиын таулы аймақтарға арналған 180 мінбе ат жұмылдырылған.
Техникалардың үздіксіз жұмысын қамтамасыз ету үшін қажетті жанар-жағармай қоры да алдын ала дайындалған. Қоймаларда 7,9 тонна дизель отыны мен 10,8 тонна бензин сақтаулы тұр.
Мамандардың айтуынша, орман өрттерінің басым бөлігі адам әрекетінен туындайды. Сондықтан тұрғындардың табиғат аясында демалу кезінде өрт қауіпсіздігі талаптарын қатаң сақтауы аса маңызды. Орманда от жақпау, жанған темекі тұқылын тастамау, қоқысты бей-берекет қалдырмау секілді қарапайым ережелердің өзі табиғатты сақтауға үлкен үлес қосады.
Таза қоршаған орта мен жасыл желек – елдің ортақ байлығы. Сондықтан табиғатты қорғау ісі тек мамандардың ғана емес, әрбір азаматтың жауапкершілігі болуы тиіс. Орманды сақтау – экологиялық қауіпсіздікті қамтамасыз етудің және келер ұрпаққа көркем табиғатты аман жеткізудің маңызды кепілі.
