Жорабек Ақжол Асқарұлы 2004 жылдың 16 қыркүйегінде Жетісу облысы, Кербұлақ ауданына қарасты Шоқан ауылында дүниеге келген. Туған жердің топырағында елін сүйген, рухы биік азамат болып өсіп, 2025 жылдың 8 наурызында Қазақстан Республикасы Қарулы Күштері қатарына шақырылды. Бүгінде Жетісу өңірі шекарасының шебінде Отан алдындағы қасиетті борышын адал өтеп келеді.
Ақжол — арнайы орта білім иесі. Ол Теміржол саласы бойынша жолсерік мамандығын меңгеріп, еңбексүйгіштігі мен тәртіпке бейімділігін әскерге дейін-ақ көрсете білді. Еркін күреспен тұрақты түрде айналысып, аудандық және облыстық жарыстарда жүлделі орындар алып, спорттық шеберлігін шыңдады. Әскер қатарында да осы бағыттағы белсенділігін тоқтатпай, шекарашы жауынгерлер арасында өткізілетін спорттық сайыстарда үздік нәтижелерге қол жеткізіп жүр.
Қатардағы жауынгер Жорабек Ақжол дене даярлығы бойынша жоғары көрсеткіштерге ие:
- Денені жерден көтеру жаттығуынан 111 мәрте орындап, 1-орынды жеңіп алды.
- 10х10 эстафеталық жүгіруде 24 секунд нәтижемен 2-орынды еншіледі.
- 400 метр қашықтыққа жүгіруде 1 минут 07 секунд көрсеткішпен 3-орынға ие болды.
- Гир көтеруден 47 мәрте нәтижемен 3-орын алды.
Ақжол көпбалалы отбасынан шыққан, үйдің ортаншы перзенті. Оның екі әпкесі, бір ағасы және бір інісі бар. Жорабек ата-анасының үмітін ақтап, ел тыныштығын күзетуде жанқиярлықпен қызмет атқаруда. Қарулы Күштер қатарындағы әрбір күні жас сарбазды шыңдап, тәртіптілік пен отансүйгіштік қасиеттерін одан әрі қалыптастыруда.
Қатардағы жауынгер Жорабек Ақжол Асқарұлы шекара шебінде өз міндетін абыроймен орындап, ел қауіпсіздігінің сенімді тірегіне айналып отыр. Оның еңбекқорлығы мен жауынгерлік рухы қарулас серіктеріне үлгі болуда.
ҚР ҰҚК Шекара қызметі Жетісу облысы бойынша депаратаменті
