Дауыс беру процесі құқықтық алаң аясында өтіп жатыр, деп хабарлайды BAQ.KZ.
Прокуратура органдары АЭС салу мәселесі бойынша республикалық референдум өткізудің заңдылығын жоғары қадағалауды қамтамасыз етеді, ал ішкі істер органдарының жеке құрамы қызмет өткерудің күшейтілген нұсқасына ауыстырылды.
Бас прокуратурасы мен ІІМ өкілдері ОКҚ алаңында өткен брифинг барысында қабылданып жатқан шаралар туралы хабардар етті.
БП Қоғамдық мүдделерді қорғау қызметі басқармасының бастығы Бекжан Қараманов референдум күні, яғни бүгін үгіт-насихатқа тыйым салынғанын еске салды. Сондай-ақ, сауалнама нәтижелерін масс-медиа мен онлайн-платформаларда жариялауға жол берілмейді.
Учаскелік комиссиялардың дауыс беруге арналған үй-жайларда да осындай сауалнамалар жүргізуге де тыйым салынады. Осы талаптарды сақтамау Әкімшілік құқық бұзушылық туралы кодекстің 102 және 120-баптары бойынша жауапкершілікке әкеп соғады. Қазіргі уақытта мұндай фактілер туралы хабарламалар түскен жоқ, — деді спикер.
Бекжан Карамановтың айтуынша, референдум туралы барлық өтініштерді соттар мен прокуратура органдары бүгін дереу қарайды.
Дауыс беру процесі құқықтық алаң аясында өтіп жатыр. Референдум комиссиялары мен мемлекеттік органдар тарапынан бұзушылықтар тіркелген жоқ. Референдум өткізудің заңдылығын қадағалауды жалғастырамыз, — деп түйіндеді Бас прокуратура өкілі.
Ел бойынша қоғамдық тәртіпті сақтауға 33 мыңға жуық полиция қызметкері мен Ұлттық ұланның әскери қызметшілері жұмылдырылды. Оның ішінде, 18 мың полиция қызметкері 10 мыңнан астам референдум учаскесінде қызмет атқаруда. ОКҚ алаңында өткен брифинг барысында ҚР ІІМ ресми өкілі Шыңғыс Алекешев осындай деректерді келтірді. Оның айтуынша, басшы және командалық құрамның тәулік бойғы кезекшілігі ұйымдастырылды.
Қазіргі уақытта, қоғамдық тәртіптің бұзылу фактілері тіркелген жоқ. Мемлекеттік органдармен бірлесіп, референдум учаскелерінде алдын ала комиссиялық тексерулер жүргізілді. Олардың техникалық талаптарға сәйкестігі, өртке қарсы қауіпсіздігі және терроризмге қарсы қорғалуы қаралды. Бұл нысандардың барлығы тәулік бойы күзетке алынды, — деді спикер.
ІІМ ресми өкілі сондай-ақ, полиция қызметкерлерінің референдум өткізу процесіне араласуға, сондай-ақ, дауыс беруге арналған үй-жайларда болуға құқығы жоқ екенін атап өтті. Олар дауыс беру залына Комиссия төрағасының шақыруымен ғана келеді.
Азаматтар сайлау және республикалық референдум туралы заңның бұзылуы туралы өтініш түсірген жағдайда ішкі істер органдарының кезекші бөліміне ақпарат жіберіп, прокуратура органдарын хабардар етеді.
Ішкі істер министрлігі ел тұрғындары мен қонақтарын заңды сақтауға, құқықтық тәртіпті қамтамасыз етуге бағытталған қауіпсіздік шараларына түсіністікпен қарауға шақырады, — деді Шыңғыс Алекешев.
