2026 жылғы 9 шілдеде таулы аймақта жауған нөсер жауын салдарынан Жаркенттің Үсек өзеніндегі су деңгейі күрт көтерілді. Соның салдарынан өзен арнасында болған екі кәмелетке толмаған жасөспірім жағалауға шыға алмай, қауіп жағдайында қалды.
Оқиға орнына полиция қызметкерлері, төтенше жағдайлар бөлімшелері, жергілікті атқарушы орган өкілдері және жергілікті тұрғындар жедел жетті. Олардың үйлесімді, кәсіби және жедел іс-қимылының нәтижесінде жасөспірімдер аман-есен құтқарылып, қауіпсіз жерге эвакуацияланды.
Медициналық тексеруден кейін жасөспірімдер үйлеріне жіберілді. Олардың өмірі мен денсаулығына қауіп төніп тұрған жоқ. Жасөспірімдердің ата-аналары құтқару жұмысына қатысқан барлық азаматтарға шынайы алғыстарын білдірді.
Жетісу облысының полиция департаменті өңір тұрғындары мен қонақтарына, әсіресе нөсер жауын-шашын кезінде және су деңгейі күрт көтерілген жағдайда өзендер мен басқа да су айдындарының маңында қауіпсіздік талаптарын қатаң сақтауды ескертеді. Сондай-ақ ата-аналарға балаларды қараусыз қалдырмай, оларға судағы қауіпсіздік ережелерін үнемі түсіндіріп отыру ұсынылады.
