Мемлекет басшысы Қасым-Жомарт Тоқаев өз Жолдауында еліміздің тұрақты дамуы үшін электр энергиясының маңызы зор екенін атап өткен болатын. Президент алдағы бес жылда қуаты 6,3 гигаватт болатын «жасыл» энергия нысандарын іске қосу жоспарланып отырғанын айтып, Қазақстанның болашағы жаңартылатын энергия көздерімен тығыз байланысты екенін жеткізді. Бұл бастамалар бүгінде өңірлерде нақты жүзеге асып жатыр.
Соңғы жылдары Жаркент өңірі де заманауи технологияларды игеріп, «жасыл» энергетика саласына бет бұра бастады. Әсіресе күн энергиясын тиімді пайдалану бағытындағы жұмыстар қарқын алып келеді. Бұл бастамалар ауданның өндірістік әлеуетін арттырып қана қоймай, болашақта тұрғындарды экологиялық таза әрі тиімді қуат көзімен қамтамасыз етуге мүмкіндік бермек.
Бүгінде «Қорғас-Шығыс қақпасы» арнайы экономикалық аймағында күн энергиясы арқылы 20 мегаватт электр қуатын өндіретін жаңа стансы құрылысы жүргізілуде. Жалпы аумағы 40 гектар жерді қамтитын жоба – өңірдегі ірі индустриялық-инновациялық бастамалардың бірі.
Жобаны «Jetysu Terra Power» компаниясы жүзеге асыруда. Мамандардың айтуынша, мұнда орнатылатын күн батареялары әлемдік стандарттарға сай жоғары технологиялық үлгідегі құрылғылар болмақ. Фотоэлектрлік қондырғылар жүйесі жоғары сапалы жарық беріп, арнайы термотөзімді әйнектерден жасалған панельдер ұзақ мерзімге төзімді келеді. Сонымен қатар олар толықтай экологиялық талаптарға сәйкес келеді.
Бұл стансы іске қосылған кезде арнайы экономикалық аймақтағы өндіріс орындарын қосымша электр энергиясымен қамтамасыз етуге мүмкіндік туады. Сонымен қатар энергетикалық нарықтағы бәсекені арттырып, электр қуатының қолжетімді болуына оң әсерін тигізбек.
Жаркент өңіріндегі күн энергетикасының дамуына үлес қосып отырған маңызды кәсіпорындардың бірі – Miami Solar күн панельдерін шығаратын өндіріс орны. Бұл кәсіпорын ауданның «жасыл» энергетика саласындағы әлеуетін арттырып, жаңа технологияларды енгізуге жол ашуда.
Панфилов ауданының табиғи-климаттық ерекшелігі күн энергиясын өндіруге өте қолайлы. Күн сәулесінің мол түсуі – баламалы энергия көздерін дамытуға үлкен мүмкіндік. Сондықтан алдағы уақытта Жаркент өңірі Қазақстандағы «жасыл» энергетиканың маңызды орталықтарының біріне айналуы әбден мүмкін.
Бүгінгі таңда әлем елдері қоршаған ортаны қорғау мен энергия тапшылығын еңсерудің тиімді жолы ретінде күн энергетикасына ерекше көңіл бөліп отыр. Осы бағыттағы Жаркент өңірінде қолға алынған жобалар – елдің болашақ дамуына салынған инвестиция әрі келешек ұрпаққа жасалған маңызды қадам.
Қ.Ибрайымжанов
