Қоршаған ортаның тазалығы – адам денсаулығы мен қоғам мәдениетінің айнасы. Бүгінде елімізде кең көлемде жүзеге асып жатқан «Таза Қазақстан» экологиялық акциясы табиғатты қорғауға, туған жерге жанашырлықпен қарауға үндейтін маңызды бастамаға айналды. Бұл игі шараға Панфилов ауданындағы мектеп оқушылары да белсене қатысып келеді.
Аудан мектептерінде тазалық жұмыстары жүйелі түрде ұйымдастырылып, оқушылар мектеп ауласын, саябақтар мен көшелерді тазалау жұмыстарына атсалысуда. Сонымен қатар жас көшеттер отырғызып, қоршаған ортаны қорғаудың маңыздылығын насихаттап жүр. Мұндай шаралар жас ұрпақтың табиғатқа деген сүйіспеншілігін арттырып қана қоймай, еңбекке баулиды.
Ұстаздар мен ата-аналардың айтуынша, тазалыққа тәрбиелеу – баланың бойына жауапкершілік пен тәртіп қалыптастырудың бір жолы. Себебі айналаны таза ұстауға дағдыланған бала ертең елін, жерін қадірлейтін азамат болып өседі.
Панфилов ауданындағы оқушылардың белсенділігі – көпке үлгі боларлық іс. Олар тек білім алып қана қоймай, қоғам өміріне араласып, туған өлкенің көркеюіне өз үлестерін қосуда. Әсіресе жастардың осындай экологиялық бастамаларға қатысуы келешек ұрпақтың саналы әрі мәдениетті болып қалыптасуына ықпал етеді.
«Таза Қазақстан» акциясы – тек бір күндік шара емес, бұл – әр азаматтың өмір салтына айналуы тиіс маңызды құндылық. Табиғатты аялау, тазалықты сақтау – баршамыздың ортақ міндетіміз. Ал осы жолда белсенділік танытып жүрген жас ұрпақ еліміздің жарқын болашағы екені сөзсіз.
Марлан МҰХАМЕТЖАН
